Albisteak

Europako Parlamentuak iritzia eman du umeentzako esnearen eta osasun-beharrizan bereziak dituzten pertsonentzako (zeliakoak, diabetikoak, etab.) elikagaien etiketatzeari eta edukiari buruzko arau zorrotzagoak ezartzen dituen araudiari buruz. Asmoa da kontsumitzaileak babestea eta argitasun juridiko handiagoa ematea elikagaien industriari.

Gaixotasun bereziak dituzten pertsonentzako elikagaien etiketek, aurkezpenek eta publizitateak "zehatzak, argiak eta ulergarriak izan behar dute kontsumitzaileentzat". Ezin dira nahasgarriak izan eta ezin dute mediku-alegaziorik izan, eurodiputatuek txostenean esandakoari jarraiki. Guztira aldeko 603 botorekin, aurkako 3rekin eta 8 abstentziorekin onetsi da.

Umeentzako esneak

Amaren esnea hartzeak dakartzan onurak ikusita, Euroganberak eskatzen du urtebetetik beherako umeentzako hauts-esnearen etiketa eta publizitateetan ez agertzea jaioberrien argazkirik edo produktu horien erabilera idealizatzea dakarren irudirik. Gainera, Europako Batzordeari 12 eta 36 hilabete bitarteko umeentzako esnearen (“jarraipen-esnea” edo “hazteko esnea” izenekin ere ezaguna) salmenta arautzen duen arau-sorta konplexua berrikustea eskatzen dio, baita, beharrezkotzat jotzen badu, arau berriak proposatzea ere.

Glutenarekiko eta laktosarekiko intolerantzia

Europako Parlamentuak legeria horretan glutenik gabeko produktu bereziei ezartzen zaizkien etiketatze-arauak sartzea gomendatzen du. Glutenarekiko intolerantzia duten pertsonentzako elikagaiek 100 mg gluten baino gutxiago eduki behar dute kg bakoitzeko (“oso gluten-kopuru txikia” etiketarekin), edo 20 mg gluten baino gutxiago kg bakoitzeko (“glutenik gabe” izendapena jasotzeko). Eurodiputatuek, gainera, Batzordeari azterlan bat prestatzea eskatu diote, laktosarekiko intolerantzia duen jendearentzako informazio-hutsuneak eta arau zehatzen beharrizana aztertze aldera.

Pisuaren kontrola

Euroganbera kezkatuta agertu da gero eta elikagai gehiagotan adierazten delako produktu horrek argaltzea errazten duten ezaugarriak dituela. Diputatu gehienek uste dute etiketatzeari buruzko arau berrietan sartu behar direla eguneroko elikagaiak ordezkatzeko dieta-produktuak edo gizenegientzako dieta zehatzetan gomendatutako produktuak (besteak beste, barratxoak eta irabiakiak).

Kontrol bereziak

Elikagaien enpresek agintari nazionalei azaldu beharko diete zein produktu berri dagoen legeria horren menpe. Agintariek, euren aldetik, ziurtatu egin beharko dute azalpen hori ez dela produktuak merkaturatu ondoren ematen.

Testuingurua

Araudi-zirriborro horrek gaur egungo zenbait lege-testu ordezkatuko ditu, Europako elikagaien merkatuaren % 1 eta % 2 bitartean hartzen duen produktu-multzoaren etiketatzeari eta osaerari buruzko arauak sinpletu eta argitze aldera. Eguneratzea kontsumitzaileek eta agintariek herritar gehienentzako eta beharrizan bereziak dituzten herritarrentzako elikagaiak bereizteko orduan zituzten zailtasunak atzematean proposatu zen.

Pentsuen Ekoizleen Europako Federazioak (FEFAC) txosten bat argitaratu du. Txostena iraunkortasun-arloko lan-talde espezializatu batek egin du, eta hiru kapitulu nagusi dauzka:

• Lehenengo kapituluan animalien elikadurarako industriaren ikuspegi orokorra deskribatzen da iraunkortasunari dagokionez, eta pentsuen hornidura arduratsua da kapituluaren ardatza.
• Bigarren kapituluan FEFACen jarduerak deskribatzen dira, metodologiak harmonizatzeari dagokionez. Atal horretan hainbat proposamen egiten dira, erabilitako metodologien alor problematikoenak konpontze aldera. Ildo horretan, FEFACek proposatzen du alde interesdunen artean elkarrizketak jarraitua eta jariakorra izan behar duela.
• Azken kapitulua Europa mailan identifikatutako erronka politiko nagusiei buruzkoa da. Honako hauek dira, besteak beste, politika horiek: Europako Nekazaritza Politikaren Erreforma, Europako Arrantza Politikaren Erreforma, Baliabideen Eraginkortasunerako Estrategia UE 2020 eta Kontsumo eta Ekoizpen Iraunkorraren aldeko Europako politika berria.

Halaber, txostenean nazio mailan ingurumen alderdiak hobetzeko gauzatzen diren ekimenen adibideak ematen dira.

Txostena

Pentsu-ekoizpen propioaren kopuru berriak abeltzaintza ekologikoan Europako Batzordeak 505/2012 Araudia argitaratu du.

Araudi horren bidez, ezarri egiten da txerrien eta oilategi-hegaztien ustiategietan bertan ekoitzitako pentsuen gutxieneko kopurua, eta igo egiten da kopurua belarjaleei dagokienez.

• Txerriak eta oilategi-hegaztiak: pentsuen % 20 gutxienez ustiategian bertan ekoitzi behar da, eta, ezinezkoa bada, eremu berean ekoitziko da, beste ustiategi ekologiko edo pentsu enpresa batzuen laguntzarekin.
• Belarjaleak: ustiategian bertan ekoitzi beharreko pentsu-kopurua % 60ra igo da. Ezinezkoa bada, eremu berean ekoitziko da pentsua, beste ustiategi ekologiko edo pentsu-enpresa batzuen laguntzarekin.

Araudi berriak, halaber, epe jakin batean eta salbuespen gisa, proteina-pentsu ez ekologikoen portzentaje txikia ekoizteko baimena ezartzen du.

Araudia

2012ko maiatzaren 29an Elikagaien ekoizpena eta elikagaien segurtasuna: gaur egungo erronkak – “lehenengo sektoretik kontsumitzailearengana” jardunaldia egin zen Vitoria-Gasteizko Europa Biltzar eta Erakusketa Jauregian.

Aurkezpenak