Beste batzuk

ENTEROBAKTERIOAK ETA HORIEN GARRANTZIA ELIKAGAIEN INDUSTRIAN BURUZKO TXOSTENA 12/01/12

Bizi Zientzietako Nazioarteko Institutuak (ILSI) txosten bat argitaratu berri du. Txostena enterobakterioei eta horiek elikagaien industrian duten garrantziari buruzkoa da.

Enterobakterioak (Enterobacteriaceae familia) bakterio Gram-negatiboak dira, ez dute esporarik sortzen eta gizakiak ezagutzen dituen bakterioen talde garrantzitsuenetako bat osatzen dute. Familia horrek bere baitan hartzen ditu patogeno garrantzitsu batzuk; besteak beste, Salmonella, Yersinia enterocolitica, Escherichia coli patogenoak (E. coli O157:H7 barne), Shigella spp. eta Cronobacter spp. Familiako beste kide batzuk patogeno oportunistatzat jotzen dira, adibidez: Klebsiella, Serratia spp. eta Citrobacter spp espezieak.

Elikagaiek transmiti ditzaketen gaixotasunen etiologiaz gain, familiako zenbait kide lotuta daude, halaber, elikagaien narriadurarekin, eta, ondorioz, elikagaien industrian galera handiak eragitearekin.

Enterobacteriaceae familiako zenbait genero (koliformeak izenekoak) laktosa hartzitzeko gai dira, eta industrian adierazle gisa erabili izan dira. Gaur egun, hala enterobakterioak nola koliformeak elikagaietatik isolatu egiten dira elikagaien higiene eza, prozedura desegokia (batik bat, tenperatura altuko tratamendua)… agerian uzteko. Adibidez, E. coli erabiltzen da zenbait elikagairen gorotz kutsadura agerian uzteko.

Enterobakterioak atzeman eta zenbatzeko metodoak ez dira asko aldatu lehenengo aldiz erabiltzen hasi zirenetik, eta askok jarraitzen dute pentsatzen bakterioak ingurune selektiboetan hazten direla, energia iturri gisa karbohidratoen (adibidez, glukosa) erabilerarekin batera. Nolanahi ere, dagoeneko eskura daude patogeno zehatzak (besteak beste, Salmonella eta E. coli O157) atzemateko hainbat metodo azkar.

Txostenean honako alderdi hauei buruzko informazioa biltzen da:

• Aldaketak taxonomian.
• Enterobakterioak eta horien zeregina elikagaien kutsaduraren adierazle gisa.
• Elikagaietan enterobakterioak atzemateko metodoak.
• Elikagaien narriadurarekin zerikusia duten enterobakterioak.
• Hazkuntza, jarduera eza eta biziraupena.

Dokumentua

ELIKAGAIETAKO GEHIGARRIEI BURUZKO LIBURUXKA 11/10/26

ELIKAk elikagaietako gehigarriei buruzko informazioa bildu du liburuxka batean: esparru arautzailea, sailkapena eta definizioa, eiketatua eta gehigarriak erabiltzeko baimena.

EUROPAKO GIDALIBURUA: ARRAUTZEZ EGINDAKO PRODUKTUAK EKOIZTEKO PRAKTIKA EGOKIAK 2011/09/15

Arrautza Ekoizleen Europako Elkarteak (EEPA) gidaliburu bat argitaratu berri du. Gidaliburua arrautzez egindako produktuak (arrautza likidoa, deshidratatua, kontzentratua eta abar) ekoizteko Praktika Egokiei buruzkoa da, eta Europako Batzordeak gidaliburu erkide gisa onetsi du. Gidaliburu honetan arrautzen prozesuari buruz hitz egiten da, alegia, arrautza jasotzen denetik arrautzez egindako produktuak banatzen direnera arteko prozesuaz. Nolanahi ere, ez die erreferentzia egiten kontsumitzeko prest dauden arrautza produktuei, baizik eta elikagai osagai gisa erabiltzen diren produktu eratorriei.

Honako hauek dira gidaliburuaren helburuak:

• Europako merkatuan arrautza-produktuen segurtasuna bermatzea. Horretarako, indarrean dauden lege europarrak bete behar dira.

• Erreferentzia osagarria ematea erakunde eskudunei euren ikuskaritzetarako.

• Oinarria eratzea arrautzen produktu eratorrien industriarentzat, alegia, Europako Erkidegokoa ez den herrialde batekoa izan eta bere produktuak Europako Batasunera esportatu nahi dituen industriarentzat.

• Elikagaien enpresetako eragileei baimena ematea aukera ezberdinak hauta ditzaten, euren establezimenduen egoeraren arabera. Gidaliburuak praktika egokien atal guztiak lantzen ditu, hain zuzen ere, indarren dagoen legedia betetzeko eta elikagai seguruak eta ez kaltegarriak ekoizteko beharrezkoak diren atal guztiak.