Beste batzuk

KLIMA ALDAKETA ETA OSASUNA 11/12/02

Osasun, Gizarte Politika eta Berdintasun Ministerioaren Osasunaren eta Klima Aldaketaren Behategiak (MISACO) gune birtual bat egokitu du bere web orrian. Gune horretan osasunaren eta klima aldaketaren arteko loturari buruzko informazio zabala biltzen da.

Atari horren xedea da komunikazio tresna izatea adituen eta gizartearen artean.

Osasunean eragina izan dezaketen alderdiei buruzko informazioa jaso ahal izango da, besteak beste: tenperatura, fenomeno meteorologikoak eta klima jatorriko arriskuak, airearen kalitatea eta kutsadura fotokimikoa, uraren eta elikagaien bidez transmititzen diren gaixotasunak, hainbat bektoreren (adibidez: eltxoak eta akainak) bidez transmiti daitezkeen gaixotasunen hedapena eta biodibertsitatearen galera. Alderdi horiek guztiek klima aldaketarekin dute zerikusia eta eragina izan dezakete osasunean.

Horrez gain, atari horretan albisteak eta berriak ere aurkituko ditugu, bai eta agiriak, txostenak eta lotura interesgarriak ere. Behatokiak osasun eta klima aldaketa arloko adituen topaketa antolatu zuen irailean, Mahoneko Lazaretoan. Topaketa hartan lan-taldeak eratu ziren eta horiek egindako lanen emaitzak atarian argitaratuko dituzte.

Osasunaren eta Klima Aldaketaren Behategiaren atari berria
Klima aldaketa eta akainak

EAEKO ABELTZAINTZA-USTIATEGIEN BANAKETARI BURUZKO DATUAK 11/11/24

EUSTATek (Euskal Estatistika Erakundea) argitaratu berri ditu Euskal Autonomia Erkidegoko abeltzaintza-ustiategien banaketari buruzko datuak, lurralde historikoen eta eskualdeen arabera eta ustiategia zuzentzen duen pertsonaren prestakuntzaren eta sexuaren arabera.

Halaber, konparatu egin ditu 1999. eta 2009. urteetako datuak.

Datuak

EKINTZA ERKIDEA ERLEAK BABESTEKO 11/10/20

Zenbait faktore hilgarrik eragina dute erle-kolonien osasunean, bai Europar Batasunean, bai nazioartean.

Gaur egungo albaitaritza-arloko ikerketak eta jarduerak ez dira eraginkorrak erleei eragiten dieten gaixotasunak prebenitu eta kontrolatzeko. Hori dela eta, Nekazaritzarako eta Landa Garapenerako Batzordeak Europako Batzordeari eta estatu kideei eskatu die ahalegin handiagoa egin dezatela erlezaintza-sektoreari laguntzeko egoera zail hori gainditzen.

Batzordearen balioespenaren arabera, landare-espezieen % 84k eta Europan elikagaien ekoizpenaren % 76k behar dute erleek gauzatzen duten polinizazioa. Beraz, proposatu dute ekintza koordinatua gauzatzea, ikerketan inbertsio handiagoa egitea eta erlezaintza-programak finantzatzea.

Honako hauek dira gomendatu dituzten neurrietako batzuk:

• Erlezaintzarako finantza-laguntza handitzea, Nekazaritza Politika Erkide berriarekin bat, 2013. urtetik aurrera.
• Ikerketa koordinatua gauzatzeko laguntza areagotzea.
• Informazioa partekatu dadin sustatzea.
• Prestakuntza egokia eskaintzea erlezainei, abeltzainei eta albaitariei.

Gainera, Batzordeak etengabe kontrolatu behar du animalien osasunaren bilakaera hirugarren herrialdeetan, aplikatu egin behar ditu animalien osasun-arloko betekizun zorrotzenak eta abian jarri behar du kontrol-sistema egokia inportatutako elikagaientzat, erleen gaixotasun exotikoak sartzea ekiditeko.

EParen erlei burzko txostena