ELIKABerri

ELIKAk, Nekazaritzako Elikagaien Segurtasuneko Euskal Fundazioak, txosten bat argitaratu du iaz jasotako hainbat jakinarazpeni buruzkoa. Aipatutako jakinarazpenak RASFFen bidez (Europako Informazio Azkarreko Sistema) zein RASVEren bidez (Albaitaritzako Osasun Alerta Sarea) jaso dira.

RASFF/RASVE txostena

NZFSAk beste balioztapen bat argitaratu du norobirusek kozinatu gabeko moluskuetan eragin dezaketen arriskuari buruz. Birus horiek dira gizakien arteko gastroenteritisaren lehenengo eragile ez bakterianoak. Kusku biko moluskuentzat, berriz, ur beltzak dira norobirusez kutsatzeko bide nagusia. Zelanda Berrian ostra gordinen kontsumoa da birus mota horrek eragin dezakeen intoxikazioaren arrazoi nagusia.

NZFSAren Balioztapena

Ingurumen eta Nekazaritza zein Itsas Gaietako Ministerioak eskuliburu bat argitaratu du ekoizpen ekologikoan praktika egokiei buruz. Gidaliburuak erreferentzia egiten die landaresien erabilerari eta horiek izurrien kontrolean duten eginkizunari.

Gidaliburu horretan, batetik, zerrendatu egin dute zergatik garatzen dituzten landaresiek izurrien aurkako etsai naturalak, eta, bestetik, zehaztu egin dute zein izurri mota kontrolatzen den landaresien bidez. Eskuliburuak “BUENAS PRACTICAS EN PRODUCCION ECOLOGICA: FUNCIONALIDAD DE LOS SETOS” (ISBN 978-84-491-0858-7) du izenburua, eta honako helbide honetan eskura daiteke: MARMen denda birtuala.

Europako Batzordeak txostena argitaratu du Hegazti-gripearen Zaintzari buruz. Txostena 2008. urtekoa da eta Hegazti-hazkuntzari egiten dio erreferentzia. Estatu Kideetako (EMak) 34.985 hegazti-ustiategitan baino gehiagotan (2007. urtean 126.912) laginak hartu eta horri buruzko datuak biltzen dira txosten horretan. Emaitzen arabera, 89 ustiategitan Patogenotasun eskaseko Hegazti-gripearen birusa (IAPB) antzeman dute 10 Estatu Kidetan, 54 ustiategitan (gehienak Frantzian, Belgikan, Danimarkan eta Erresuma Batuan) H5 azpimota antzeman dute eta 21 ustiategitan (gehienak Italian) H7 azpimota antzeman dute. Aurreko urteetan bezala, Patogenotasun eskaseko Hegazti-gripearen H5 eta H7 serotipoen prebalentzia baxua izan da, eta ahateen eta antzaren ustiategiak izan dira kaltetuenak.

Txostena

MARMek aurkezpen-laburpen bat argitaratu du Espainian Mingain Urdin gaixotasunaren egoerari buruz. Aurkezpen horrek 2009. urteari egiten dio erreferentzia. Azken diapositibak erakusten du zein den 2010. urterako aurreikusi den 4 serotipoaren arrisku eremua. Bestaldetik, aurreikuspen hori Marokok, Aljeriak eta Tunezek jakinarazitako fokuen araberakoa da.

Mingain Urdin gaixotasunaren egoera 2009

EFSAk jakinarazpen bat argitaratu du gaixotasun horri buruz, kontuan hartuta gaixotasunaren geografia-hedapena zabala dela eta estatu kide batzuetan gora egin duela kasuen kopuruak. Behiak dira gaixotasunaren (B.besnoiti) eragilearen bitarteko ostalari ezagunak. Nolanahi ere, ez dago esaterik zein den gaixotasunaren garapen-zikloa, ez eta behin betiko ostalaria ere. Badirudi zuzeneko eta zeharkako transmisio horizontalaren bidez hedatzen dela gaixotasuna, eta artropodoak direla sintomarik gabeko animalien eta animalia osasuntsuen arteko transmisio-bektoreetako bat. Bestalde, badirudi ez direla parasitoaren gordailu, ez basoko hausnarkariak, ezta seguru asko karraskariak ere. Maiz gaixotasunak ez ditu sintomak sorrarazten. Horrelakoetan, kisteak baino ez dira azaltzen. Dena dela, sintomak azaltzen direnean, arinak izan daitezke, baina baita heriotza-eragileak ere. Gaur egun, Europan ez dago gaixotasunaren aurkako ez txertorik, ez tratamendurik.

Jakinarazpena

2010eko urtarrilaren 23an kendu zituzten Gipuzkoa probintzian ezarritako murriztapen-gunean gauzatzen ari ziren kontrol-neurriak. Izan ere, hegazti zinegetikoen ustiategi batean Newcastle gaixotasunaren foku bat antzeman ondoren, murriztapen-gune hori ezarri zuten.
2009ko azaroaren 27an jakinarazi zuten ofizialki fokua. Osasun agintariek indarrean dagoen legediak xedatzen dituen neurri guztiak gauzatu zituzten, besteak beste: ustiategiko animaliak hiltzea, ustiategia garbitu eta desinfektatzea eta babes- eta zaintza-guneak ezartzea.
Zaintza eta kontrol lan zorrotzak gauzatu ondoren, ez zen kasu positiborik antzeman murriztapen-gunea garbitu eta desinfektatzeko lanak amaitu ondorengo hilabetean; hori dela eta, kendu egin dituzte kontrol-neurriak.

Informazioa

Elikagaiei gehitzen zaizkien gehigarrien eta nutriente-iturrien gaineko Zientzia Batzordeak (SNA) zientzia-irizpen bat aurkeztu du metakrilato baseko kopolimeroak erabiltzeari buruz, elikagai solidoen gehigarrien estaldura gisa. Substantziaren eginkizun teknologikoa da tratatutako produktuak hezetasunetik babestea eta produktu horiek izaten dituzten nutrienteen zaporea estaltzea. Eskatzaileak honako hauei buruzko azterlanak eskaini zituen: absortzioa, banaketa, metabolismoa eta iraizketa, akutuak eta azpi toxikotasun kronikoa, genotoxikotasuna eta metakrilato baseko kopolimeroaren toxikotasunaren garapena. Metakrilato baseko kopolimeroa ahoz hartu ondoren, tratu gastrointestinalak ez du ia xurgatzen; izan ere, molekula-egonkortasun handiko konposatua da.

Taldeak proba bat egin zuen Salmonella typhimuriumean geneek izan dezaketen mutazioari buruz. Probak emaitza negatiboak eman zituen, eta horietan oinarrituta, ondorioztatu dute metakrilato baseko kopolimeroa ez dela genotoxikoa.

Taldeak kasurik okerreneko esposizioaren balioespena egin du. Konprimitu bakoitzaren estaldura-maila 100 mg-koa bada, metakrilato baseko kopolimero ugari kontsumitzen dutenen esposizio konbinatua (elikagai osagarrietan proposatutako erabileraren eta farmazia-produktuetan onetsitako erabileraren bidezko esposizioa) honako hau izango da: 23,4 mg/gorputz pisuko kg-ko eta eguneko, 60 kiloko helduentzat; eta 16 mg/gorputz pisuko kg-ko eta eguneko, 4 eta 18 urte bitarteko ume eta gazteentzat. Eskatzaileak, berriz, uste du esposizioaren balioespenak hau izan behar duela: 20 mg/gorputz pisuko kg-ko eta eguneko eta 16 mg/gorputz pisuko kg-ko eta eguneko, hurrenez hurren. Konprimitu bakoitzaren estaldura-maila normala bada (gehienez ere 30 mg/konprimitu),

Taldeak balioesten du metakrilato baseko kopolimero ugari kontsumitzen dutenen esposizio konbinatua (elikagai osagarrietan proposatutako erabileraren eta farmazia-produktuetan onetsitako erabileraren bidezko esposizioa) honako hau izango dela: 7 mg/gorputz pisuñ kg-ko eta eguneko, 60 kiloko helduentzat; eta 4,8 mg/gorputz pisuko kg-ko eta eguneko, umeentzat. Eskatzailearen balioespena, berriz, honako hau da erabiltzaile talde horientzat: 6 mg/gorputz pisuko kg-ko eta eguneko, eta 4,8 mg/gorputz pisuko kg-ko eta eguneko.

Zientzia irizpena

Europako Batzordeak 116/2010 Araudia argitaratu du, 1924/2006 Araudia aldarazten duena nutrizio jakinarazpenen zerrendari dagokionez, eta omega 3 gantz-azidoen, gantz monoinsaturatuen, poliinsaturatuen eta insaturatuen nutrizio jakinarazpenak eta erabilera baldintzak argitaratzen dituena. Jakinarazpen hori elikagai batean baino ezin izango da egin:

- Produktu bat omega 3 azidoen iturri izango da, baldin eta gutxienez 0,3 g azido alfa linoleniko baldin badu 100 g-ko eta 100 Kcal-ko, edo gutxienez azido eikosapentanoikoaren eta azido dekosahexanoikoaren kopuru osoaren 40 mg 100 g-ko eta 100 Kcal-ko.

- Produktu batek omega 3 azidoen kopuru handia izango du, baldin eta gutxienez 0,6 g azido alfa linoleniko baldin badu 100 g-ko eta 100 Kcal-ko, edo gutxienez azido eikosapentanoikoaren eta azido dekosahexanoikoaren kopuru osoaren 80 mg 100 g-ko eta 100 Kcal-ko.

- Produktu batek gantz monoinsaturatuen kopuru handia izango du, baldin eta produktuak dituen gantz-azidoen % 45 gutxienez gantz monoinsaturatuak badira eta gantz horiek produktuaren balio energetikoaren % 20 baino gehiago osatzen badute.

- Produktu batek gantz polinsaturatuen kopuru handia izango du, baldin eta produktuak dituen gantz-azidoen % 45 gutxienez gantz poliinsaturatuak badira eta gantz horiek produktuaren balio energetikoaren % 20 baino gehiago osatzen badute.

- Produktu batek gantz insaturatuen kopuru handia izango du, baldin eta produktuak dituen gantz-azidoen % 70 gutxienez gantz insaturatuak badira eta gantz horiek produktuaren balio energetikoaren % 20 baino gehiago osatzen badute.

Informazio gehiago