Higienea

FVOREN IKUSKAPEN-TXOSTENA ESPAINIAKO PENTSUETAN EGINDAKO KONTROL OFIZIALEI BURUZ 11/06/30

2011ko otsailean, FVOk ikuskapen bat egin zuen Espainian egiaztatzeko. Alde batetik, ea Europako araudiak jasotzen dituen betekizunak Espainian ezarrita dauden ala ez. Eta, bestetik, ea erakunde eskudunek egiten dituzten kontrolak bat datozen 882/2004 Araudiarekin. Horretarako, FVOk honako autonomia erkidego hauek bisitatu zituen: Aragoi, Andaluzia eta Galizia.

Oro har, 2008. urtean FVOk berak egindako azken ikuskapenean eman zituen gomendioei dagokienez, FVOk uste du aurrerapen mugatua egin dela esparru horretan. Izan ere, pentsuak ekoizten dituzten enpresen erregistroari bagagozkio, FVOk adierazi du Aragoin eta Galizian ia establezimendu guztiak erregistratuta daudela, baina Andaluzian badirela ehunka enpresa erregistrorik gabe lanean dabiltzanak.

Bestalde, FVOk jakinarazi du APPCC arloari buruzko betetze maila baxua dela bisitatutako enpresa gehienetan, bereziki arriskuak identifikatu eta kudeatzeko esparruan. Adibidez: kaltegarriak izan litezkeen substantziak identifikatu eta kudeatzeko esparruan.

Azkenik, FVOk ondorioztatu du, inportatutako produktuen kontrol ofizialak oro har hobetu badira ere, sarrera gune ugari badaudela non laginak hartzeko programa ofizialaren intentsitatea oso baxua den eta arriskuan oinarrituta egon barik.

Txostena

PRAKTIKA EGOKIEN GIDALIBURUA: PENTSUETARAKO LEHENGAI SEGURUEN EKOIZPENA

Europako Batzordeak argitaratu egin du pentsuetarako lehengai seguruak ekoizteko Europako Praktika Egokien Gidaliburuaren bertsio berri bat. Gidaliburua Europako Parlamentuaren eta Kontseiluaren 183/2205/CE Araudian (pentsuen higieneari dagozkion eskakizunak ezartzen dituena) sartzen da, bereziki 20. artikulutik 22.era bitartekoetan. Artikulu horiek sustatu egiten dute higiene praktika egokiei buruzko gidaliburuak egitea eta APPCC printzipioak erabiltzea. Gidaliburuak zehaztu egiten du zein diren hazi-olioa erauzteko, olioa fintzeko eta almidoia prozesatzeko industriek jarraitu behar dituzten irizpideak, animalientzako elikagaiak ekoizteko merkatura ateratzen diren lehengaiak seguruak direla bermatzeko.

Gidaliburua

LABOREEN, OLEAGINOSOEN ETA PROTEAGINOSOEN SEGURTASUNA

COCERALek (Europako Laboreen Merkatarien Elkartea) eta COGECAk (Europa Batasuneko nekazaritza kooperatibak elkartzen dituen erakundea) Higiene Praktika Egokien Europako Gidaliburua garatu dute laboreak, oleaginosoak eta proteaginosoak jaso, biltegiratu, merkaturatu eta garraiatzeko.

Gidaliburuaren helburua da erreferentziazko dokumentua izatea, Europako higiene arauak betetzen direla ziurtatzen laguntzeko, elikagaien eta pentsuen arriskuak kontrolatzeko eta merkatuan dauden elikagaien eta pentsuen segurtasuna bermatzeko.